လင်းလက်နေခြည်

သမိုင်းကြောင်း

၁။ ရုရှားဖက်ဒရေးရှင်းနိုင်ငံတွင် အဂတိလိုက်စားမှုတိုက်ဖျက်ရေးနှင့် စပ်လျဉ်း၍ ၁၉၉၂ ခုနှစ်၊ ဧပြီလ ၄ ရက်နေ့တွင် သမ္မတ Boris Yeltsin က အများပြည်သူ ဝန်ဆောင်မှုလုပ်ငန်းများတွင် ဖြစ်ပွားနေသည့် အဂတိလိုက်စားမှုများကို တိုက်ဖျက်နိုင်ရေး အမိန့်ဒီဂရီတစ်ခုကို ထုတ်ပြန်ခဲ့သည်။ အဆိုပါအမိန့်ဒီဂရီအရ အများပြည်သူဆိုင်ရာအရာရှိများအနေဖြင့် စီးပွားရေးလုပ်ငန်းများ လုပ်ကိုင်ခြင်း ကို တားမြစ်ထားသည်။ ထို့အပြင် နိုင်ငံ့ဝန်ထမ်းများအနေဖြင့် ၎င်းတို့၏ ဝင်ငွေ၊ အိမ်ခြံမြေနှင့် အခြား ပိုင်ဆိုင်မှုများ၊ ဘဏ်စာရင်းများ၊ ငွေကြေးပိုင်ဆိုင်မှုစာရင်းများကို ထုတ်ဖော်ကြေညာရသည်။ အဆိုပါ ဆောင်ရွက်ချက်များသည် အဂတိလိုက်စားမှုတိုက်ဖျက်ရေး ကနဦးဆောင်ရွက်ချက်များပင် ဖြစ်သည်။

၂။ ရုရှားသမ္မတ ဒီမစ်ထရီ မာဘီဒတ် (Dmitry Medvedev) သည် သမ္မတရာထူးကို ရယူခဲ့ပြီး နောက် ၂၀၀၈ ခုနှစ်၊ မေလ ၁၉ ရက်နေ့တွင် အဂတိလိုက်စားမှုတိုက်ဖျက်ရေး အစီအစဉ်တစ်ခုကို လက်မှတ်ရေးထိုးကာ အဂတိလိုက်စားမှုတိုက်ဖျက်ရေးကောင်စီ (Anti-Corruption Council) ကို ဖွဲ့စည်းခဲ့သည်။ ၂၀၀၈ ခုနှစ်၊ ဇူလိုင်လတွင် အမျိုးသားအဆင့် အဂတိလိုက်စားမှုတိုက်ဖျက်ရေး အစီ အစဉ်တစ်ခုကို ချမှတ်ကာ နိုင်ငံပိုင်သတင်းစာမှတစ်ဆင့် ပြည်သူသို့ ထုတ်ပြန်ကြေညာခဲ့သည်။ 

ဒီမစ်ထရီလက်ထက် ဆောင်ရွက်ချက်များ

၃။ အဂတိလိုက်စားမှုတိုက်ဖျက်ရေးကောင်စီ၏ ပထမဦးဆုံး အကြိမ်အဖြစ် ကျင်းပသည့် အစည်းအဝေးတွင် “မိမိအနေနဲ့ ရိုးရိုးရှင်းရှင်းနဲ့ စိတ်မကောင်းစရာစကားကို ထပ်ပြောရဦးမယ်။ မိမိတို့နိုင်ငံမှာ အဂတိလိုက်စားမှုတွေ ပျံ့နှံ့နေပြီး၊ ရုရှားလူ့အဖွဲ့အစည်းရဲ့ ပုံမှန်ကြုံတွေ့နေကျ အရာ တစ်ခုလိုဖြစ်နေပြီ” လို့ ထုတ်ဖော်ပြောကြားခဲ့သည်။ ဒီမစ်ထရီ ချမှတ်ခဲ့သည့် အမျိုးသားအဆင့် အဂတိလိုက်စားမှုတိုက်ဖျက်ရေး အစီအစဉ်တွင် အဂတိလိုက်စားမှုတိုက်ဖျက်ရေးဥပဒေ တစ်ခုကို ပြဋ္ဌာန်းသွားရန် ချမှတ်ထားသဖြင့် ၂၀၀၈ ခုနှစ်၊ ဒီဇင်ဘာလ ၂၅ ရက်နေ့တွင် အဂတိလိုက်စားမှု တန်ပြန်တိုက်ဖျက်ရေးဥပဒေ (On Corruption Counteraction) ကို ဥပဒေအမှတ် 273-FZ ဖြင့် ပြဋ္ဌာန်းခဲ့သည်။

၄။ ဒီမစ်ထရီအနေဖြင့် အဂတိလိုက်စားမှုတိုက်ဖျက်ရေးကို ပထမဦးစားပေး ဆောင်ရွက်ခဲ့ သည်ကို တွေ့ရသည်။ ဥပဒေပြဋ္ဌာန်းပြီး ၂၀၁၀ ပြည့်နှစ်၊ ဧပြီလ ၁၃ ရက်နေ့တွင် သမ္မတရုံးအမိန့် ဒီဂရီ ၄၆၀ ဖြင့် အမျိုးသားအဆင့် အဂတိလိုက်စားမှုတိုက်ဖျက်ရေး မဟာဗျူဟာကို ချမှတ်ခဲ့ပြီး ၂ နှစ် ၁ ကြိမ် ပြင်ဆင်ဖြည့်စွက်ခြင်း ပြုလုပ်ခဲ့သည်။ သို့ရာတွင် အဂတိလိုက်စားမှုတိုက်ဖျက်ရေးလုပ်ငန်း များ သိသာထင်ရှားစွာ အောင်မြင်စွာ ဆောင်ရွက်နိုင်ခြင်းမရှိခဲ့သည့် ဒီမစ်ထရီအနေဖြင့် ၂၀၁၁ ခုနှစ်၊ မေလ ၄ ရက်နေ့တွင် Criminal Code နှင့် Code of Administrative Offences တို့ကို ပြင်ဆင်ကာ အဂတိလိုက်စားမှုနှင့်စပ်လျဉ်း၍ ပြစ်ဒဏ်ချမှတ်မှုကို အဆ ၁၀၀ ခန့်အထိ တိုးမြှင့်ကာ ရူဘယ် သန်း ၅၀၀ ထိ တိုးမြှင့်ခဲ့သည်။

ဗလာတီမာပူတင် လက်ထက်တွင်လည်း

၅။ ဒီမစ်ထရီ၏ ဆောင်ရွက်မှုများသည် သိသာထင်ရှားသည့် ရလဒ်များရခဲ့ပြီး အပြည်ပြည် ဆိုင်ရာ ပွင့်လင်းမြင်သာမှုရှိရေးအဖွဲ့၏ အဂတိလိုက်စားမှု အညွှန်းကိန်းများတွင် ရမှတ်များ သိသာ ထင်ရှားစွာ တိုးတက်လာခဲ့ပြီး ၂၀၁၁ ခုနှစ်တွင် ယခင်နှစ်ထက် ရမှတ်တိုးတက်လာပြီး နိုင်ငံအဆင့် ၁၁ ဆင့်အထိ တိုးတက်လာခဲ့သည်။

၆။ ရုရှားနိုင်ငံ၏ အဂတိလိုက်စားမှုတိုက်ဖျက်ရေးအကြောင်း လေ့လာမည်ဆိုပါက လက်ရှိသမ္မတဖြစ်သူ ဗလာတီမာ ပူတင်၏ အခန်းကဏ္ဍကိုပါ ထည့်သွင်းသုံးသပ်ရန် လိုအပ်မည်ဖြစ်ပါ သည်။ ပူတင်သည် ၁၉၉၉ ခုနှစ်မှ ၂၀၀၀ ပြည့်နှစ်အထိ လည်းကောင်း၊ ၂၀၀၈ ခုနှစ်မှ ၂၀၁၂ ခုနှစ် အထိ လည်းကောင်း ဝန်ကြီးချုပ်တာဝန်ထမ်းဆောင်ခဲ့သူဖြစ်ပြီး ၂၀၀၀ ခုနှစ်မှ ၂၀၀၈ ခုနှစ်အထိ လည်းကောင်း၊ ၂၀၁၂ ခုနှစ်မှ လက်ရှိအချိန်အထိလည်းကောင်း သမ္မတတာဝန် ထမ်းဆောင်နေသူ လည်း ဖြစ်သည်။

၇။ ဒီမစ်ထရီလက်ထက်တွင် ဝန်ကြီးချုပ်တာဝန်ဖြင့် အဂတိလိုက်စားမှုတိုက်ဖျက်ရေးလုပ်ငန်း များကို ပါဝင်ဆောင်ရွက်ခဲ့ပြီး ၎င်းစတင်တာဝန်ယူသည့်အချိန် အဂတိလိုက်စားမှုတိုက်ဖျက်ရေး အတွက် အရေးကြီးသည့် ပိုင်ဆိုင်မှုကြေညာခြင်း အခန်းကဏ္ဍကို စတင်မိတ်ဆက်ခဲ့သည်။ ၂၀၁၂ ခုနှစ်၊ ဒီဇင်ဘာလတွင် အဂတိလိုက်စားမှုတိုက်ဖျက်ရေးဥပဒေကို ပြင်ဆင်ပြဋ္ဌာန်းခဲ့ပြီး အများပြည်သူ ဆိုင်ရာ အရာရှိများနှင့် စစ်ဘက်ဆိုင်ရာအရာရှိများ၏ လုပ်ငန်းတာဝန်ထမ်းဆောင်မှုတွင် အကျိုး စီးပွားပဋိပက္ခဖြစ်မှု အခြေအနေများကို တားဆီးနိုင်ရေး ဆောင်ရွက်ခဲ့ပြီး အစိုးရဌာန အဖွဲ့အစည်း များတွင် တာဝန်ထမ်းဆောင်နေသော ဝန်ထမ်းများ၏ ပိုင်ဆိုင်မှုကို ထုတ်ဖော်ကြေညာရန် ဆောင် ရွက်ခဲ့သည်။

၈။ ထို့ပြင် ဥပဒေပါ ပုဒ်မများကို ပြင်ဆင်ဖြည့်စွက်ခြင်းများ ဆောင်ရွက်ခဲ့ပြီး ဥပဒေ ပုဒ်မ ၁၃၀ တွင် အဖွဲ့အစည်းများအားလုံးအနေဖြင့် “အဂတိလိုက်စားမှု တားဆီးကာကွယ်ရေးဌာန သို့မဟုတ် တာဝန်ခံများထားရှိရန်၊ အခြားအဖွဲ့အစည်းများနှင့် ပူးပေါင်းဆောင်ရွက်ရန်၊ စီးပွားရေးလုပ်ငန်းများ နှင့် အစိုးရဌာနအဖွဲ့အစည်းများတွင် ကျင့်ဝတ်ချမှတ်ထားရန်၊ အကျိုးစီးပွားပဋိပက္ခ တားဆီး ကာကွယ်ရေးတို့ကို ဆောင်ရွက်ရန်နှင့် စာရင်းအင်း ကိန်းဂဏန်း အချက်အလက်များကို လိမ်လည် ခြင်းမရှိစေရေးတို့ ဆောင်ရွက်ရန်” ပြဋ္ဌာန်းထားသည်။ အထူးသဖြင့် ပူတင်လက်ထက်တွင် စီးပွားရေး ပူးပေါင်းဆောင်ရွက်မှုနှင့် ဖွံ့ဖြိုးတိုးတက်မှုဆိုင်ရာ အဖွဲ့အစည်း (OECD) လာဘ်ပေး လာဘ်ယူမှု တိုက်ဖျက်ရေး ကွန်ဗင်းရှင်းသို့ ၂၀၁၂ ခုနှစ်တွင် အဖွဲ့ဝင်အဖြစ် ဝင်ရောက်ခဲ့သည်။

အဂတိလိုက်စားမှုတိုက်ဖျက်ရေးမဟာဗျူဟာ

၉။ ရုရှားနိုင်ငံတွင် ၂၀၂၁ ခုနှစ်၊ ဩဂုတ်လ ၁၆ ရက်နေ့တွင် အမိန့်ဒီဂရီအမှတ် ၄၇၈ ဖြင့် အမျိုးသားအဆင့် အဂတိလိုက်စားမှုတိုက်ဖျက်ရေး အစီအစဉ် (၂၀၂၁-၂၀၂၄) ကို ချမှတ်ခဲ့သည်။ အစီအစဉ်တွင် အဂတိလိုက်စားမှုတိုက်ဖျက်ရေး စံနှုန်းများချမှတ်ခြင်း၊ အကျိုးစီးပွားပဋိပက္ခ တားဆီး ကာကွယ်ခြင်း၊ စုံစမ်းစစ်ဆေးခြင်း၊ သတင်းအချက်အလက်များ လုံခြုံစွာထိန်းသိမ်းခြင်း၊ ပုဂ္ဂလိက ကဏ္ဍ အဂတိလိုက်စားမှုတိုက်ဖျက်ခြင်း၊ အများပြည်သူ ဝယ်ယူမှုကဏ္ဍ၌ အဂတိလိုက်စားမှု တိုက်ဖျက်ခြင်း၊ အရပ်ဘက် လူမှုအဖွဲ့အစည်းများနှင့် ပူးပေါင်းဆောင်ရွက်ခြင်း၊ အသိပညာပေးခြင်း နှင့် ပြည်တွင်းပြည်ပ ပူးပေါင်းဆောင်ရွက်ခြင်း အပါအဝင် လုပ်ငန်းနယ်ပယ် (၁၆) ခု ပါဝင်သည်။

အကျိုးစီးပွားပဋိပက္ခ တားဆီးကာကွယ်ခြင်းနှင့် ပိုင်ဆိုင်မှုကြေညာခြင်း

၁၀။ အမျိုးသားအဆင့် အဂတိလိုက်စားမှုတိုက်ဖျက်ရေးအစီအစဉ်တွင် အကျိုးစီးပွားပဋိပက္ခ အခြေအနေများကို တားဆီးကာကွယ်နိုင်ရေးအတွက် အစိုးရဌာန အဖွဲ့အစည်းများအတွင်း ရာထူး တိုးမြှင့်ခြင်း ကဲ့သို့သော ရပိုင်ခွင့်များနှင့် ပြောင်းရွှေ့တာဝန်ထမ်းဆောင်စေခြင်းတို့တွင် အဂတိ လိုက်စားမှုများ မဖြစ်ပေါ်စေရန် လိုအပ်သော မူဝါဒလုပ်ထုံးလုပ်နည်းများ ချမှတ်ထားရန် ပြဋ္ဌာန်း ထားသည်။

၁၁။ အဂတိလိုက်စားမှုတိုက်ဖျက်ရေး ဥပဒေပုဒ်မ ၁၀ တွင် အစိုးရဝန်ထမ်းများနှင့် စည်ပင် သာယာရေး ဝန်ထမ်းများအနေဖြင့် အများပြည်သူအကျိုးစီးပွား သို့မဟုတ် သက်ဆိုင်ရာအဖွဲ့အစည်း သို့မဟုတ် နိုင်ငံတော်၏ အကျိုးစီးပွားအတွက် ဆောင်ရွက်ရာတွင် ပုဂ္ဂိုလ်ရေးအကျိုးစီးပွားအတွက် ရောထွေးဆောင်ရွက်ခြင်းနှင့် လုပ်ငန်းတာဝန်ထမ်းဆောင်မှုများတွင် ပြည်သူ့ဘဏ္ဍာငွေ၊ ပြည်သူပိုင် ပစ္စည်းများနှင့် အခြားဘေးကိစ္စရပ်များတွင် ကိုယ်ကျိုးစီးပွားများ ဦးတည်ဆောင်ရွက်ခြင်းဖြင့် အကျိုး စီးပွားပဋိပက္ခ အခြေအနေကို ဖြစ်ပေါ်စေသည်ဟု ဖော်ပြထားသည်။

၁၂။ ပုဒ်မ ၁၁ တွင် အစိုးရဝန်ထမ်းများနှင့် စည်ပင်သာယာရေး ဝန်ထမ်းများသည် ယခု ကဲ့သို့သော အခြေအနေများကို ရှောင်ရှားနိုင်ရန်အတွက် လိုအပ်သော အစီအမံများ စီမံဆောင်ရွက် ရန်နှင့် ထိုကဲ့သို့သော အခြေအနေများပေါ်ပေါက်ပါက သတိပြုမိသည်နှင့် အထက်အဆင့်သို့ စာဖြင့် ရေးသားတင်ပြရန်လိုအပ်ပြီး သက်ဆိုင်ရာ ဌာန/အဖွဲ့အစည်းများ အနေဖြင့်လည်း လိုအပ်ပါက အကျိုးစီးပွားပဋိပက္ခ တားဆီးကာကွယ်ရေးအတွက် တားဆီးကာကွယ်ရေးလုပ်ငန်းစဉ်များ ချမှတ် ထားရန် ပြဋ္ဌာန်းထားသည်။

၁၃။ ထို့အပြင် အစိုးရဝန်ထမ်း သို့မဟုတ် စည်ပင်သာယာရေး ဝန်ထမ်းများအနေဖြင့် ကိုယ်ပိုင် စီးပွားရေးလုပ်ငန်း လုပ်ကိုင်ခြင်း၊ အခြားစီးပွားရေးလုပ်ငန်းများတွင် အစုရှယ်ယာပါဝင်ခြင်း ကဲ့သို့သော စီးပွားရေးလုပ်ငန်း လုပ်ကိုင်ဆောင်ရွက်မှုရှိနေပါက အဆိုပါ စီးပွားရေးလုပ်ငန်းကို ယုံကြည်စိတ်ချ ရသော အခြားသူတစ်ဦးထံသို့ တရားဝင်လွှဲပြောင်းပေးခြင်းဖြင့် အကျိုးစီးပွားပဋိပက္ခ အခြေအနေကို တားဆီးရန် ပြဋ္ဌာန်းထားသည်။ အကျိုးစီးပွားပဋိပက္ခ အခြေအနေကို စစ်ဆေးဖော်ထုတ် တွေ့ရှိရပါက ရာထူးမှ ထုတ်ပယ်ခြင်းကဲ့သို့သော စည်းမျဉ်းစည်းကမ်း ဥပဒေနှင့်အညီ အရေးယူဆောင်ရွက်သွားရန် ပုဒ်မ ၁၁ (င) တွင် ပြဋ္ဌာန်းထားပါသည်။

၁၄။ အဂတိလိုက်စားမှုတားဆီးကာကွယ်‌ရေးတွင် အကျိုးစီးပွားပဋိပက္ခ တားဆီးကာကွယ်နိုင် ရေးအတွက် ပိုင်ဆိုင်မှုကြေညာခြင်း၏ အခန်းကဏ္ဍသည် လွန်စွာအရေးကြီးသဖြင့် ရုရှားနိုင်ငံ၏ အဂတိလိုက်စားမှုတိုက်ဖျက်ရေး ဥပဒေပုဒ်မ (၈) တွင် အစိုးရဝန်ထမ်းများနှင့် စည်ပင်သာယာရေး ဝန်ထမ်းများအနေဖြင့် ၎င်းတို့၏ ပိုင်ဆိုင်မှု၊ ဝင်ငွေ၊ ရရန်ပိုင်ခွင့်နှင့် ပေးရန်တာဝန်များ စာရင်းကို သက်ဆိုင်ရာ ဌာနသို့ တင်သွင်းရန် တာဝန်ရှိသည်။ ပိုင်ဆိုင်မှုကြေညာခြင်းကို ပျက်ကွက်ပါက ဥပဒေ အရ အရေးယူခံရမည်ဖြစ်ပြီး သက်ဆိုင်ရာဌာနများအနေဖြင့် ပိုင်ဆိုင်မှုကြေညာခြင်းပါ အချက်အလက် များကို လျှို့ဝှက် ထိန်းသိမ်းထားရန်ဖြစ်ပြီး လိုအပ်သည့် အချက်အလက်များကို အများပြည်သူသို့ ထုတ်ပြန်ကြေညာရန် ဖြစ်သည်။

ပိုင်ဆိုင်မှုကြေညာခြင်း ညွှန်ကြားချက်

၁၅။ ရုရှားနိုင်ငံတွင် အစိုးရဝန်ထမ်းများနှင့် စည်ပင်သာယာရေး ဝန်ထမ်းများ၏ ပိုင်ဆိုင်မှု ကြေညာခြင်းနှင့် စပ်လျဉ်း၍ အမိန့်ကြေညာချက်တစ်ခုကို ၂၀၂၀ ပြည့်နှစ်၊ ဒီဇင်ဘာလ ၁၅ ရက်နေ့ တွင် ထုတ်ပြန်ကြေညာခဲ့သည်။ အဆိုပါ ကြေညာချက်အရ အများပြည်သူဆိုင်ရာ ဌာနများတွင် တာဝန်ထမ်းဆောင်ရန် လျှောက်ထားသူများ၊ တာဝန်ထမ်းဆောင်ရသူများနှင့် ၎င်းတို့၏ အိမ်ထောင် ဘက်များ၊ အမွေစားအမွေခံ သားသမီးများအနေဖြင့် ၎င်းတို့၏ ပိုင်ဆိုင်မှု၊ ရရန်ပိုင်ခွင့်နှင့် ပေးရန် တာဝန်များကို ၂၀၂၁ ခုနှစ်၊ ဇန်နဝါရီလ ၁ ရက်နေ့မှ ဇွန်လ ၃၀ ရက်နေ့အတွင်း တင်ပြသွားရန် ဖြစ်ပါ သည်။

၁၆။ ပိုင်ဆိုင်မှုကြေညာထားသည့် ဝန်ထမ်းများ၏ အချက်အလက်များကို http://state. Kremlin.ru/president/income/administration/incomes တွင် ဝင်ရောက်ကြည့်ရှု လေ့လာနိုင် သည်။ ၂၀၂၁ ခုနှစ် ဇူလိုင်လ၏ စာရင်းများအရ အများပြည်သူဆိုင်ရာ အရာရှိ ၇၉၁,၇၃၈ ဦးတို့ အနေဖြင့် ပိုင်ဆိုင်မှုကြေညာထားသည်ကို တွေ့ရသည်။

နိုင်ငံတကာပူးပေါင်းဆောင်ရွက်ရေး

၁၇။ ရုရှားနိုင်ငံသည် ကုလသမဂ္ဂ အဂတိလိုက်စားမှုတိုက်ဖျက်ရေး ကွန်ဗင်းရှင်းသို့ ၂၀၀၆ ခုနှစ်၊ မတ်လ ၈ ရက်နေ့တွင် အတည်ပြုဝင်ရောက်ထားသည်။ အပြည်ပြည်ဆိုင်ရာ ပွင့်လင်းမြင်သာမှုရှိရေး အဖွဲ့ (TI) နှင့်လည်း နီးကပ်သည့် ဆက်ဆံရေးတည်ဆောက်ထားနိုင်ပြီး TI ရုံးခွဲကို ၁၉၉၃ ခုနှစ် ကတည်းက ရုရှားတွင် ဖွင့်လှစ်ထားနိုင်ခဲ့ပြီး အဖွဲ့အစည်းပေါင်း ၁၀၀ နှင့်လက်တွဲ၍ အဂတိလိုက်စားမှု တားဆီးကာကွယ်ရေးလုပ်ငန်းများ ဆောင်ရွက်လျက်ရှိသည်။ ထို့ပြင် Kaliningrad, Saint Petersburg, Moscow, Yekaterin burg နှင့် Barnaul တို့တွင် TI ရုံးခွဲများ ဖွင့်လှစ်ထားသည်။ 

ရလဒ်များ

၁၈။ အပြည်ပြည်ဆိုင်ရာပွင့်လင်းမြင်သာမှုရှိရေးအဖွဲ့၏ ၂၀၂၁ ခုနှစ်အတွက် ထုတ်ပြန်သည့် အဂတိလိုက်စားမှုအညွှန်းကိန်း (Corruption Perception Index _ CPI) တွင် ရုရှားနိုင်ငံ၏ ရမှတ် များကို လေ့လာကြည့်ပါက အောက်ပါအတိုင်း တွေ့ရသည်-

ပုံ-၁ ရုရှားနိုင်ငံ၏ CPI ရမှတ်များ ( 0 သည် အဂတိလိုက်စားမှုတိုက်ဖျက်ရေး အဆိုးဆုံးဖြစ်၍ ၁၀၀ သည် အကောင်းဆုံးဖြစ်သည်)

ကမ္ဘာ့ဘဏ်၏ အဂတိလိုက်စားမှုထိန်းချုပ်နိုင်မှု အညွှန်းကိန်းရလဒ်

၁၉။ ကမ္ဘာ့ဘဏ်၏ အဂတိလိုက်စားမှု ထိန်းချုပ်နိုင်မှု အညွှန်းကိန်းရလဒ်များကို လေ့လာ ကြည့်မည်ဆိုပါကလည်း ရုရှားနိုင်ငံသည် အဂတိလိုက်စားမှုကို အတိုင်းအတာတစ်ခုအထိ ထိန်းချုပ် ဆောင်ရွက်နေသည်ကို တွေ့ရှိရသည်-

ပုံ-၂ ရုရှားနိုင်ငံ၏ အဂတိလိုက်စားမှုထိန်းချုပ်နိုင်မှု ရမှတ်များ ( ၁၀0 သည် အဂတိလိုက်စားမှု ထိန်းချုပ်နိုင်မှု အကောင်းဆုံးဖြစ်၍ ၀ သည် ထိန်းချုပ်နိုင်မှုမရှိခြင်းကိုဖော်ပြသည်)

နိုင်ငံတကာလေ့လာ

၂၀။ မိမိတို့ မြန်မာနိုင်ငံတွင်လည်း အဂတိလိုက်စားမှုတိုက်ဖျက်ရေးလုပ်ငန်းများကို ပြဋ္ဌာန်းပြီး ဖြစ်သည့် အဂတိလိုက်စားမှုတိုက်ဖျက်ရေးဉပဒေနှင့်အညီ အရေးယူဆောင်ရွက်လျက်ရှိသည်။ ရုရှားနိုင်ငံကဲ့သို့သော စီးပွားရေး၊ နိုင်ငံရေးနှင့် စစ်ရေး စသည်ဖြင့် အဘက်ဘက်မှ ပြည့်စုံသည့် နိုင်ငံပင်လျင် အဂတိလိုက်စားမှုများကို တွန်းလှန်တိုက်ဖျက်နေရဆဲဖြစ်သည်ကို တွေ့ရသည်။ သို့ဖြစ်ရာ မြန်မာနိုင်ငံအနေဖြင့် ဒေသတွင်းနှင့် နိုင်ငံတကာ အဂတိလိုက်စားမှုတိုက်ဖျက်ရေး အေဂျင်စီများ၏ ‌ဆောင်ရွက်မှုများကို အစဉ်လေ့လာ၍ မိမိနိုင်ငံ အဂတိလိုက်စားမှုတိုက်ဖျက်ရေး လုပ်ငန်းများတွင် နမူနာသင့်သည်များ ရယူနိုင်ရေး ရေးသားပြုစုတင်ပြလိုက်ရပါသည်။

ရည်ညွှန်းကိုးကား

- https://anticor.hse.ru/

- https://www.dlapiper.com/en-us 

- https://www.transparency.org/en/

- https://www.unodc.org/unodc/en/

- https://www.worldbank.org/en/who-we-are

- အခြားအချက်အလက်များ