နေပြည်တော်၊ ဒီဇင်ဘာလ  ၂၈ ရက်

    အဂတိလိုက်စားမှုတိုက်ဖျက်ရေးကော်မရှင်ရုံးတွင် တာဝန်ထမ်းဆောင်နေသော အရာထမ်း၊ အမှုထမ်းများအား လုပ်ငန်းစွမ်းဆောင်ရည် (Capacity Building) မြှင့်တင်ရန်၊ ဝန်ထမ်းများ၏လေ့လာမှုနှင့် စာဖတ်စွမ်းရည် မြင့်မားလာစေရန်၊ အများရှေ့တွင် တင်ပြနိုင်မှုစွမ်းရည်  (Presentation Skill) မြှင့်တင်ရန်၊ ဖြောင့်မတ်တည်ကြည်မှုနှင့် အဂတိလိုက်စားမှုတိုက်ဖျက်ရေးဆိုင်ရာ အသိပညာဗဟုသုတများ မျှဝေပေးနိုင်ရန်အတွက် ဖြောင့်မတ်တည်ကြည်မှုနှင့် အဂတိလိုက်စားမှုတိုက်ဖျက်ရေးခေါင်းစဉ်ဖြင့် အလုပ်ရုံဆွေးနွေးပွဲကို ၂၀၂၃ ခုနှစ်၊ ဒီဇင်ဘာလ ၂၈ ရက်နေ့ နံနက် ၀၉:၃၀ နာရီတွင် အဂတိလိုက်စားမှုတိုက်ဖျက်ရေးကော်မရှင်ရုံး၊ စုပေါင်းခန်းမ၌ ကျင်းပပြုလုပ်ခဲ့ရာ အခမ်းအနားသို့ ကော်မရှင်ဥက္ကဋ္ဌ၊ ကော်မရှင်အတွင်းရေးမှူးနှင့် အဖွဲ့ဝင်များ၊ ညွှန်ကြားရေးမှူးချုပ်များ၊ ဒုတိယညွှန်ကြားရေးမှူးချုပ်များ၊ ဆွေးနွေးပွဲတွင် ပါဝင်ဆွေးနွေးမည့် Speaker များနှင့် အရာထမ်း၊ အမှုထမ်းများ တက်ရောက်ခဲ့ကြသည်။ 

    အခမ်းအနားတွင် ကော်မရှင်ဥက္ကဋ္ဌ ဦးစစ်အေးက အဖွင့်အမှာစကား ပြောကြားရာ၌ ယခုကဲ့သို့ အလုပ်ရုံဆွေးနွေးပွဲပြုလုပ်ခြင်းကြောင့် ဝန်ထမ်းများလေ့လာသင်ယူမှုပိုမို အားကောင်းလာမည်ဖြစ်ပြီး အသိပညာဗဟုသုတတိုးပွားလာမည်ဖြစ်ပါကြောင်း၊ ကော်မရှင်မှ ဝန်ထမ်းများအနေဖြင့် အဂတိလိုက်စားခြင်းကြောင့် ဖြစ်ပေါ်လာမည့်ဆိုးကျိုးများကို သေချာသိရှိထားမှသာလျှင် အခြားသူများသို့ အသိပညာပေးဆွေးနွေးနိုင်မည်ဖြစ်ပါကြောင်း၊ ဝန်ထမ်းများအနေဖြင့် ကိုယ်တိုင်ကျင့်ဝတ်နှင့်အညီ လိုက်နာနေထိုင်ခြင်းဖြင့် အဂတိကင်းစင်ရန် ကြိုးပမ်းဆောင်ရွက်ရမည်ဖြစ်ပါကြောင်း၊ အဂတိလိုက်စားခြင်းသည် ရှက်ရွံ့စရာဖြစ်ကြောင်း လူတိုင်းရင်ထဲစွဲမြဲသည်အထိ ပြုပြင်ပြောင်းလဲပေးနိုင်ရေးအတွက် ကော်မရှင်ရုံး ဝန်ထမ်းများမှ စံနမူနာပြ ပြုမူနေထိုင်ကျင့်ကြံရမည်ဖြစ်ပါကြောင်း၊ အဂတိလိုက်စားခြင်းသည် ကိုယ်ကျင့်တရားပျက်ယွင်းခြင်းဖြစ်သည့်အတွက် အဂတိလိုက်စားမှုကျူးလွန်သူ၏ဂုဏ်သိက္ခာကိုသာမက နိုင်ငံတော်၏ဂုဏ်သိက္ခာကိုလည်းများစွာထိခိုက် ကျဆင်းစေနိုင်ပါကြောင်း၊ အဂတိလိုက်စားမှုများကို တိုက်ဖျက်ရာတွင် ကော်မရှင်တစ်ခုတည်း၏ ကြိုးပမ်းအားထုတ်ခြင်းဖြင့် ဆောင်ရွက်နိုင်မည်မဟုတ်ပါကြောင်း၊ အစိုးရဌာနအဖွဲ့အစည်းများ၊ ပုဂ္ဂလိကအဖွဲ့အစည်းများ၊ အရပ်ဘက်အဖွဲ့အစည်းများသာမက နိုင်ငံသားတိုင်း၏ ပူးပေါင်းပါဝင်မှုများလိုအပ်ပါကြောင်း၊ အဂတိလိုက်စားမှုကို လုံးဝလက်မခံသည့် ယဉ်ကျေးမှုတစ်ရပ်ဖြစ်ပေါ်ရေးနှင့် အဂတိလိုက်စားမှုကင်းစင်သည့် လူ့အဖွဲ့အစည်းဆီသို့ဦးတည်ရာ၌ ခိုင်မာသောသန္နိဋ္ဌာန်၊ မယိမ်းမယိုင်သော ဖြောင့်မတ်တည်ကြည်မှုရှိမှသာ အောင်မြင်စွာ ဖြတ်ကျော်နိုင်မည်ဖြစ်ပါကြောင်း၊ အဂတိလိုက်စားမှုများကို လုံးဝသည်းခံခွင့်လွှတ်မှုမပြုခြင်းဖြင့် အဂတိလိုက်စားမှုကင်းစင်သော အနာဂတ်ဆီသို့ လက်တွဲဆောင်ရွက်ကြရန် လိုအပ်ကြောင်း တိုက်တွန်းပြောကြားခဲ့သည်။

    ဆက်လက်၍ ဖြောင့်မတ်တည်ကြည်မှုနှင့် အဂတိလိုက်စားမှုတိုက်ဖျက်ရေး အလုပ်ရုံဆွေးနွေးပွဲတွင် Moderator ဦးဆောင်ဆွေးနွေးသူ ညွှန်ကြားရေးမှူး ဦးလင်းဝေအောင်က ဆောင်ရွက်ပြီး ကော်မရှင်ရုံးအဖွဲ့မှ ဦးစီးအရာရှိ ဒေါ်အိအိကျော်က “အဂတိလိုက်စားမှုကို ရှက်ရွံ့ခြင်းနှင့်ဆန့်ကျင်ခြင်း” ခေါင်းစဉ်ဖြင့်လည်းကောင်း၊ စီမံရေးရာဦးစီးဌာနမှ လက်ထောက်ညွှန်ကြားရေးမှူး ဦးကျော်သူက “ဖြောင့်မတ်တည်ကြည်မှုရှိသည့် လုပ်ငန်းခွင်” ခေါင်းစဉ်ဖြင့် လည်းကောင်း၊ စုံစမ်းစစ်ဆေးရေးဦးစီးဌာနမှ ဦးစီးအရာရှိ ဒေါ်ဆုလာဘ်နွယ်က “အဂတိလိုက်စားမှုကို လုံးဝလက်သင့်မခံသည့် လူ့အသိုက်အဝန်းဆီသို့” ခေါင်းစဉ်ဖြင့်လည်းကောင်း ဆွေးနွေးတင်ပြခဲ့ပြီး တက်ရောက်လာသည့်ဝန်ထမ်းများက ပါဝင်ဆွေးနွေးခဲ့ပြီး သိရှိလိုသည်များကို မေးမြန်းကြရာ ဆွေးနွေးတင်ပြသူများက ရင်းနှီးပွင့်လင်းစွာ ပြန်လည်ဖြေကြားခဲ့ပါသည်။ ထို့နောက် ကော်မရှင်ဥက္ကဋ္ဌက နိဂုံးချုပ်စကားပြောကြားပြီး အလုပ်ရုံဆွေးနွေးပွဲကို နေ့လယ် ၁၂: ၁၅ နာရီအချိန်တွင် ရုပ်သိမ်းခဲ့ကြပါသည်။